Mountain Lion er komið út

Apple hefur sent frá sér stýrikerfið Mac OS X Mountain Lion (eða Mac OS X 10.8). Stýrikerfinu fylgja yfir 200 nýir eiginleikar, m.a. iMessage stuðningur, Reminders, Notification Center, Game Center, iCloud samstilling o.fl.

Með stýrikerfinu þá er Apple að brúa bilið á milli Mac OS X stýrikerfisins fyrir borð- og fartölvur annars vegar og iOS stýrikerfisins fyrir iPhone, iPad og iPod Touch hins vegar, til að gera líf notenda sem eiga bæði tæki einfaldara.

Mountain Lion kostar $25.09 í íslensku Mac App Store búðinni, en fyrir þá sem dveljast erlendis eða hafa ekki enn skipt yfir í íslenskan reikning þá fylgir einnig tengill á bandarísku búðina. Verðmunurinn skýrist af því að 25,5% virðisaukaskattur bætist við söluverðið í samræmi við nýmæli 35. gr. laga nr. 50/1988 um virðisaukaskatt, sem segir:

Þó skal aðili með heimilisfesti eða fasta starfsstöð erlendis sem selur rafrænt afhenta þjónustu skv. d-lið 10. tölul. 1. mgr. 12. gr. til aðila sem er ekki skráður skv. 5. gr. og er heimilisfastur eða með fasta starfsstöð hér á landi innheimta og skila virðisaukaskatti af þeirri þjónustu hér á landi. Þjónusta þessi telst ávallt nýtt þar sem kaupandi þjónustunnar hefur búsetu eða starfsstöð. Seljandi skal ótilkvaddur tilkynna starfsemi sína rafrænt á því formi sem ríkisskattstjóri ákveður. Aðilar sem selja rafrænt afhenta þjónustu fyrir 1.000.000 kr. eða minna á hverju 12 mánaða tímabili skulu undanþegnir skattskyldu.

Þeir sem keyptu Mac tölvu undanfarin mánuð þurfa þó ekki að bölva Apple í sand og ösku, því þeir munu fá uppfærslu í Mountain Lion án endurgjalds.

Mountain Lion [Íslenska Mac App Store – $25.09]

Mountain Lion [Bandaríska Mac App Store – $19.99]