Okkur berast reglulega fyrirspurnir varðandi hátt verðlag á iPhone hérlendis, sem eru oftast eitthvað á þessa leið:
[pl_blockquote cite=“Reiður lesandi“]Hvaða rugl er það að iPhone kosti 83 þúsund krónur í Boston en 150 þúsund kall á Íslandi? Þetta er bara hreinasta okur![/pl_blockquote]
Rannsóknarstofa Einstein.is hélt því í mikla sannleiksleit, til að leita skýringa á iPhone verðlagi hérlendis.
Við höfðum samband við þrjá tæknisinnaða fagurkera, þ.e. verslunareigendur Macland, iStore og iSímans, en allar þessar verslanir hafa getið sér gott orð hérlendis fyrir sölu á iPhone símum. Ýmislegt áhugavert kom fram, eins og sjá má hér fyrir neðan.
Framboð og eftirspurn
iPhone síminn frá Apple er eftirsóttasti farsími heims, enda af mörgum álitinn brjóstmylkingur tæknilegrar snilldar og fegurðar.
Í hvert sinn sem ný kynslóð af iPhone kemur á markað, þá er eftirspurnin ávallt slík, að Apple er hreinlega að framleiða símann allt of hægt. Sem dæmi má nefna að það var ekki fyrr en undir lok nóvembermánaðar að ólæstur iPhone 5 kom í almenna sölu vestanhafs (2 mánuðum eftir að hann kom á markað), og það sama var einnig uppi á teningnum varðandi iPhone 4S fyrir rúmu ári síðan.
Þessi gífurlega eftirspurn veldur því að íslenskar verslanir kaupa símann á yfirverði frá erlendum aðilum sem hafa engin tengsl við Apple. Þessir aðilar borga einstaklingum fyrir að fara í næstu Apple búð, bíða þar í röð og kaupa tvo iPhone síma. Eftir að einstaklingarnir hafa keypt tvo síma, þá reyna þeir að ýmist að endurtaka leikinn í sömu eða annarri búð, eða þurfa að finna annan aðila til að kaupa næstu tvo síma.
Af því hver sími er keyptur í gegnum ýmsa milliliði, þá má segja að ferðalag iPhone síma úr verksmiðju yfir í vasann þinn sé óhjákvæmilega mun lengra ef síminn er keyptur hérlendis. Munurinn á ferðalaginu hljóðar einhvern veginn svona:
iPhone – úr verksmiðju í vasa
| Sími keyptur á Íslandi | Sími keyptur í Apple búð |
|---|---|
| 1. iPhone kemur úr verksmiðju í Apple Store | 1. iPhone kemur úr verksmiðju í Apple Store |
| 2. Viðskiptavinur kaupir síma í Apple Store (má kaupa 2 stk) | 2. Viðskiptavinur kaupir síma í Apple Store |
| 3. Söluðili kaupir síma af einstaklingi úr skrefi 2, kemur sér upp lager og selur símana úr landi. | |
| 4. Íslenskar verslanir kaupa símann af aðila í skrefi 3. | |
| 5. Íslenskur neytandi kaupir símann úti í búð. |
Eins og áður hefur verið rakið og sést á ofangreindri töflu þá eru íslenskar verslanir að kaupa iPhone í gegnum a.m.k. tvo milliði þegar síminn er nýr á markaði. Báðir þessir aðilar taka þóknun fyrir sinn þátt í ferlinu, og leiðir til hækkunar á verði símans. Þess vegna má slá því föstu að þegar nýr iPhone sími kemur á markað, þá eru íslenskar verslanir kaupa símann á hærra verði (þ.e. með u.þ.b. 30% álagningu á listaverði) heldur en íslenskir ferðamenn, og aldrei nokkurn tímann á lægra verði heldur en býðst í Apple Store.
Einnig getur það gerst að íslenskar verslanir lenda í óviðráðanlegum atvikum sem eru með öllu óviðráðanleg, líkt og að vera sendur aftur á byrjunarreit í slönguspilinu.
[pl_blockquote pull=“right“ cite=“Sigurður Þór Helgason, eigandi iStore“]Maður hefur lent í því að pöntun sem er ætluð manni endar í Dubai, af því einhverjir auðjöfrar sem vita ekki aura sinna tal yfirbjóða mann hressilega.[/pl_blockquote]
Þegar við spurðum hver álagning verslana væru á hverjum seldum síma, þá fengum við þau svör að hún væri í raun sáralítil eða u.þ.b. 5-10% (til samanburðar þá er álagning verslana á fötum og húsgögnum oft allt að 100%). Eftir stendur þá líka kostnaður vegna lögbundinnar ábyrgðarþjónustu.
Af hverju ekki bara að kaupa símann beint frá Apple?
Þar liggur nefnilega hundurinn grafinn. Ísland, er ekki til sem markaðssvæði iPhone í heiminum. Þessu er öðruvísi farið um iPad og iPod touch, en Epli hefur leyfi frá Apple Inc. til að flytja inn og dreifa vörum fyrirtækisins hérlendis.
Í skjóli þess leyfis þá kaupir Epli hefðbundnar Apple tölvur, iPad spjaldtölvur og ýmsa aukahluti beint frá bónda (þ.e. Apple). Engir milliliðir sem taka þóknun fyrir sinn þátt í ferlinu, og betra verð fyrir neytendur.
[pl_blockquote cite=“Hörður Ágústsson, eigandi Macland“]Það er að enginn hér heima er að kaupa iPhone beint frá Apple. Enginn.[/pl_blockquote]
iPhone, er aftur á móti ekki á þessum lista. Ef iPhone væri seldur opinberlega á Íslandi þá má gera ráð fyrir að verð símans væri u.þ.b. 120 þúsund krónur, ef tekið er mið af hlutfallslegum verðmun á iPad og iPhone 5 í Bretlandi.
En síminn kostar bara 85.000 kr. í Bandaríkjunum?
Satt er það. Ódýrasta gerðin af nýjum Toyota Yaris kostar líka 1,8 milljónir króna í Bandaríkjunum, en 2,7 milljónir króna hérlendis.
Jú, Yaris-dæmið er öfgakennt, en það er einungis til að leggja áherslu á að Bandaríkin eru allt annað markaðssvæði en Evrópa, og símarnir eru seldir á markaði við gjörólík skilyrði. Þótt Bandaríkin séu einn vinsælasti áfangastaður íslenskra ferðalanga, þá er því ekki mikið vit í því að gera samanburð á verði símans vestanhafs annars vegar og hérlendis hins vegar (svo ekki sé minnst á að maður þarf að huga að ýmsu áður en iPhone 5 er keyptur í Bandaríkjunum).
[pl_blockquote cite=“Tómas Kristjánsson, eigandi iSímans“]Það er mikið raunsærra að gera verðsamanburð við Bretland heldur en Bandaríkin á Apple vörum.[/pl_blockquote]
Í ljósi þessara ummæla, þá er fróðlegt er að sjá hvert verð verð símans er að viðbættum íslenskum virðisaukaskatti, ef íslenskir ferðamenn kaupa hann Tax-Free í evrópskum Apple búðum .
| Tax-Free verð í Apple Store | Verð að viðbættum íslenskum VSK |
|---|---|
| Apple Store UK = 469.5 pund (~90.000 kr.) | 112.500 kr. |
| Apple Store DK = 4493 DKK (~100.000 kr.) | 125.500 kr. |
| Apple Store DE = 603 evrur (~100.500 kr.) | 125.500 kr. |
UPPFÆRT: Taflan var uppfærð eftir ábendingar lesenda, sýndi áður listaverð í Apple Store, gleymdist að taka Tax-Free hlutann inn í myndina (og við biðjumst velvirðingar á því). Ferðamenn fá þó ekki allan virðisaukaskatt endurgreiddan þegar síminn er keyptur með þessum hætti. Hægt er að reikna hversu mikil endurgreiðslan er af keyptri vöru með reiknivél Global Blue.
Eins og greint var frá fyrr í greininni þá eru íslenskir söluaðilar ekki að kaupa símann beint úr Apple búðum, heldur í gegnum ýmsa milliliði. Taflan er því ekki dæmi um hvað síminn kostar fyrir íslenska söluaðila. Þeir þurfa að greiða áðurnefndum milliliðum sína þóknun, borga fyrir flutning til Íslands og veita ábyrgðarþjónustu. Þegar allt er tekið saman þá var það niðurstaða okkar að iPhone sé seldur með mjög hóflegri álagningu hérlendis, þrátt fyrir að verð símans sé í hærra lagi.
14 Comments
Þið verðið að draga vaskinn af símanum í UK fyrst svo eitthvað sé að marka þennan samanburð, 529 pund á iPhone5 hjá apple.co,uk inniheldur vsk (vat) upp á 88 pund. Ef þið dragið það frá og leggið svo íslenskan vsk við, er verðið rétt rúmar 105 þúsund krónur.
Satt segirðu Matti. Það gleymdist að nefna það, en markmið töflunnar var að sýna fram á hvert verð símans er fyrir einstaklinga sem kaupa símann erlendis.
Ef maður ætlar að reyna að reikna endanlegt innkaupsverð fyrir íslenskar verslanir þá þarf að fá upplýsingar um þóknun milliliða, flutningskostnað og að lokum kostnað við að veita ábyrgðarþjónustu, sem við höfum ekki.
Ég var að hugsa það sama og Matti. Þú borgar ekki VSK í 2 löndum af sömu vörunni. Meira að segja Einstein vissi þetta 🙂
Það gleymist eiginlega alltaf þegar gerður er verðsamanburður við önnur lönd og menn tala um að kaupa e-ð þar út úr búð, að virðisaukaskatturinn í því landi fæst endurgreiddur við flutning vörunnar úr landi. Það er sífellt verið að slá ryki í augu okkar hér á landi !!!!
Hárrétt JJ (og GH56). Taflan hefur verið uppfærð, hún var ekki skýrð nægilega vel, en það hefur verið bætt úr því 🙂
Eina sem ég sé út úr þessu er að það er best að kaupa sér flugfar til Boston, kaupa síman þar. Ég keypti iphone4 2011 í Boston, flug/hotel 3 nætur/iphone4 = iphone á íslandi
góður
Sama gildir um DE. Það þarf að draga frá 19% þýskan VSK áður en þeim íslenska er bætt við. Þá myndi síminn kosta 124þ hingað kominn. Innifalið í því er álagningin í þýska Apple Store, þannig að mismunurinn á útsöluverði hér 149.900 kr. og 124Þ = 26þ kr. er hrein viðbótarálagning (lesist sem „græðgi“, ef við tölum bara um hlutina eins og þeir eru) á Íslandi að frádregnum sendingarkostnaði sem er peanuts.
Taflan hefur verið uppfærð, en hún átti einungis að gefa samanburð á innkaupsverði fyrir okkur neytendur.
Eins og drepið var í svari til Matta, þá er dæmið flóknara ef maður ætlar að reikna endanlegt innkaupsverð símans fyrir verslanir 🙂
150.000 þús. er bara aðeins of mikið fyrir einn lítinn síma. hann er flottur og allt það en 150 kall er bara of mikið
Þar sem alir bílar sem seldir eru í usa eru framleiddir þar, já líka yaris, er þessi samlíking þín að engu leiti lík sölu á iphone.
Nú er undirritaður ekki fróður um þessi mál, en við vinnslu greinarinnar þá var þessi flötur þó kannaður lítillega. Skv. eftirfarandi lista þá eru Yaris bifreiðar framleiddar í Frakklandi, Taílandi, Gana og Kína.
Sjá nánar á http://en.wikipedia.org/wiki/List_of_Toyota_manufacturing_facilities
Ef iPhone er keyptur í USA í Apple búð ólæstur fyrir þessa 700 (650+50tax) dollara sem hann kostar er hann þá tilbúinn til notkunar á Íslandi?? Svar óskast, please, þar sem dóttir mín er að drepa mig með suðinu um að fá iPhone. Skv. henni eiga ALLIR hennar jafnaldrar iPhone en hún er í 2. bekk í framhaldsskóla
Ef síminn er keyptur í Apple búð USA þá er hann tilbúinn til notkunar á Íslandi. Það er samt vert að benda á að það eru til ódýrari gerðir af iPhone heldur en iPhone 5 í Apple búðum USA. iPhone 4 kostar t.d. $450
Þá hafa sumir farið þá leið að kaupa notaða síma af eBay og sent á hótelin sín, og náð að spara sér einhvern pening með þeim hætti.